సాగునీటికి సంబంధించిన అన్ని ఇంజినీరింగ్‌ విభాగాలను ఒకే గొడుగు క్రిందికి తీసుకురానున్నట్లు రాష్ట్ర ముఖ్యమంత్రి కేసీఆర్‌ తెలిపారు. కాళేశ్వరం ప్రాజెక్టుల పరిశీలన అనంతరం కరీంనగర్‌ కలెక్టరేట్‌లో మంత్రులు, ఉన్నతాధికారులతో సీఎం సమీక్షా సమావేశం నిర్వహించారు. ఈ సందర్భంగా సీఎం మాట్లాడుతూ.. ప్రజల ఆకాంక్షలు నెరవేర్చేలా సాగునీటి లక్ష్యాల సాధనకు ఇరిగేషన్‌ ఇంజనీరింగ్‌ విభాగాలను పునర్‌ వ్యవస్థీకరించనున్నట్లు తెలిపారు. సాగునీటి ఇంజినీరింగ్‌ వ్యవస్థను 11 సర్కిల్స్‌గా విభజించనున్నట్లు చెప్పారు. సర్కిల్‌ అధిపతిగా చీఫ్‌ ఇంజినీర్‌ వ్యవహిస్తారన్నారు. జూన్‌ నెలాఖరులోగా ఇరిగేషన్‌ ఇంజినీరింగ్‌ విభాగాల్లో ఖాళీలు భర్తీ చేయాలని అధికారులను ఆదేశించారు. ఏప్రిల్‌ నెలాఖరులోగా ఇరిగేషన్‌ అధికారులు, సిబ్బందికి క్వార్టర్స్‌ల నిర్మాణం పూర్తిచేయాలన్నారు. 530 టీఎంసీల గోదావరి జలాలను ఎత్తి పోసేలా అధికారులు అన్ని విధాలుగా సంసిద్ధంగా ఉండాలన్నారు. రాష్ట్రంలోని అన్ని చెరువులను నింపేలా కార్యాచరణ సిద్ధం చేయాలని చెప్పారు. సాగునీటి కాలువలకు మే నెలాఖరులోగా అవసరమైన అన్ని మరమ్మత్తులు చేపట్టాలన్నారు. కరీంనగర్‌తో పాటు నిజామాబాద్‌ జిల్లా కేంద్రాలలో ప్రస్తుతం ఉన్న కలెక్టరేట్‌ల స్థానంలో కొత్త కలెక్టరేట్‌ల నిర్మాణం చేపట్టాలని ఇందుకు అవసరమైన చర్యలు చేపట్టాల్సిందిగా ప్రభుత్వ ప్రధాన కార్యదర్శిని సీఎం ఆదేశించారు.
అన్ని ఇంజినీరింగ్‌ విభాగాలు ఒకే గొడుగుకిందకు: సీఎం కేసీఆర్‌
• REDDABOINA VINOD KUMAR
